O Forte de San Damián

O mellor exemplo que existe de arquitectura militar en Ribadeo é o coñecido Forte de San Damián, levantado en 1624 durante a Guerra dos Oitenta Anos, coa misión de protexer os galeóns da Escuadra de Galicia que se estaban a construír no astleiro de Ribadeo, fronte á ameaza dun ataque holandés dende o mar.

Destruído nun ataque dos ingleses en 1719, foi reconstruído en 1743, e reformado e ampliado nos anos 1762-63. Desmantelado en 1809, ao principio da Guerra da Independencia, ante a chegada do exército francés a Ribadeo, e definitivamente abandonado no verán de 1810 despois de ser utilizado algúns meses como Hospital Militar.

En 1965 é adquirido polo Concello de Ribadeo ao Ministerio do Exército polo prezo simbólico de 1 peseta, sendo restaurado no ano 1990.

O concello  levou a cabo a súa restauración, conservando o muro exterior co seu bastión, as troneiras, o foxo e os contrafortes, e hoxe funciona como sala de exposicións municipal.

O forte atópase nun lugar cunhas vistas espectaculares de Ribadeo e da súa ría.